死去丈夫買的雲吞米
阿霞o既丈夫偉雄,因為開中更的士o既關係,每日都要好夜先放工.而最令阿霞感動o既係,係咁多年來,偉雄除左顧家之外,每晚返屋企之前,都會兜過隔離村,買一碗雲吞米俾阿霞做宵夜,呢個習慣,可以話係風雨無改.
同往常一樣,睇完仔仔睡覺之後,阿霞就企出露台等偉雄.當時鐘搭正十二點,偉雄o既身影好似往常咁出現係街頭,挽住一個外賣袋.不過睇落去,偉雄似乎好支力,頭耷得好低,腳步好浮.
雖然係老夫老妻,但唔知點解,每晚阿霞總要親眼望到老公平安返黎,先會鬆一口氣.當晚,一切同往常無乜分別.阿霞入廚房繼續洗碗,無耐就聽到老公o既腳步聲;鎖匙開門聲;重感覺到老公係屋入面行黎行去:開電視開雪櫃.不過偉雄今日特別靜,一直無出過聲,阿霞心入面諗,老公一定係做野做得太辛苦,所以都好識做,無諗住再煩佢.
阿霞捧住碗筷行出廳準備食宵夜,見到雲吞米放係餐桌上面,仍然冒住煙.透過玻璃o既反映,阿霞見到偉雄係走廊行入仔仔間房,重隱若聽到佢同仔仔蓋被o既聲音.所有o既畫面,都係咁熟識,咁尋常.
突然間,一串剌耳o既電話聲打破寧靜o既氣氛.
電話係差館打黎,警方同阿霞講,今晚十一點半左右o既時候,佢丈夫係吐露港公路撞車,依家係深切治療室接受搶救,叫阿霞快D趕去醫院.
阿霞完全唔識得反應,偉雄明明係屋企,點會發生意外?佢忍唔住回頭一望,見到偉雄慢慢咁由走廊行出黎,越接近客廳,身影就越清晰.突然間,阿霞發出恐怖o既尖叫聲,因為佢終於見到自己丈夫----佢全身都係血,個樣爛到根本分辦唔到輪廓,只有一對眼神,充滿住唔捨得.
好多年後,阿霞講番起呢件事,眼淚仍然無法子控制咁湧出.而最令人匪而所思o既係當日桌上面o既雲吞米,的而且確咁存在過,空氣入面彌漫住o既雲吞香味,到今日阿霞都仍然無法子忘記.
